មានកូនដំបូងគឺជារឿងរីករាយបំផុត
ប៉ុន្តែអ្នកម្តាយថ្មីថ្មោងអាចនឹងប្រឈមជាមួយបញ្ហាមួយចំនួន។
ដូច្នេះត្រៀមខ្លួនមុន គឺជារឿងដ៏ល្អប្រសើរ
ខាងក្រោមនេះគឺជាចំណុចដែលអ្នកគួរតែស្វែងយល់
និងរកវិធីដោះស្រាយក្រោយពីសម្រាលកូនរួចក្នុងពេលឆាប់ៗ។
១.ពិបាកក្នុងការបំបៅដោះកូន
អ្នកប្រហែលធ្លាប់គិតថា ការបំបៅដោះកូនគឺជារឿងធម្មជាតិ
ពេលដែលពេលវេលាមកដល់វានឹងចេះដោយឯកឯង ប៉ុន្តែការពិតផ្ទុយស្រឡះតែម្តង។
វាត្រូវការការហ្វឹកហាត់ខ្លាំង និងរយៈពេលរាប់សប្ដាហ៍ក្នុងការផ្ស៊ាំ។
អ្នកអាចមានសម្ពាធដោយសារមនុស្សជុំវិញ បង្ខំឲ្យអ្នកត្រូវតែបំបៅ
ក្រោមហេតុផលទឹកដោះម្តាយល្អខ្លាំងចំពោះទារក។
សភាពបែបនេះពិតជាមិនល្អទេសម្រាប់អ្នកនិងកូនតូច។
ដំណោះស្រាយ៖ រកអ្នកស្គាល់គ្នាណាម្នាក់ដែលមានបទពិសោធន៍ មកមើល
និងបង្ហាញ ណែនាំ យ៉ាងហោចណាស់ឲ្យបានពីរទៅបីម៉ោង។
អ្នកអាចទទួលបានយោបល់ល្អៗមួយចំនួន។ កំណត់គោលដៅ
ថាអ្នកនិងព្យាយាមយ៉ាងហោចណាស់ ឲ្យបានមួយខែ តែបើសិននៅតែមិនអាចទៅរួចទៀតគួរតែសម្រេចប្ដូរមកបំបៅដោយទឹកដោះគោវិញ។
២.ស្អប់ប្តីខ្លួនឯង
បន្ទុកជាម្តាយ ត្រូវមើលថែកូនតូច បន្ទុកជាប្រពន្ធ
ត្រូវមើលថែផ្ទះសំបែង អារម្មណ៍ម៉ួម៉ៅដោយសារ អ័រម៉ូនប្រែប្រួលក្រោយសម្រាលកូនរួច គិតថាប្តីមិនសូវជួយទុក្ខធុរៈ...
សុទ្ធតែជាអ្វីដែលអាចឲ្យអ្នកនឹងមានអារម្មណ៍ចង់លែងលះញឹកញាប់ក្នុងឆ្នាំដំបូង។
ដំណោះស្រាយ៖ ស្វាមីអ្នកមិនមែនទេវតាដែលអានចិត្តអ្នកដាច់រហូតនោះទេ។
បើចង់ឲ្យគាត់ជួយអ្វី ត្រូវប្រាប់ ឬពិភាក្សា បែងចែកការងារដែលគាត់ត្រូវធ្វើ
ដើម្បីឲ្យអ្នកបានសម្រាកខ្លះ។
៣. គិតថាខ្លួនឯងធាត់
វាជារឿងទូទៅសម្រាប់មនុស្សស្រី។ យ៉ាងហោចណាស់
វាត្រូវការរយៈពេល១ឆ្នាំដើម្បីទទួលបានគីឡូ និងរូបរាងពីមុនរបស់អ្នក។
ត្រគាករីកធំ សក់ជ្រុះ ស្បែកឡើងសរសៃ ពិតជាគួរឲ្យខ្លាច។
ដំណោះស្រាយ៖ ត្រូវគិតថា
បើអ្នកមិនឡើងគីឡូ ធ្វើម៉េចមានទឹកដោះឲ្យកូនបៅ។ ព្យាយាមហាត់ប្រាណ
ដោយការប្រលែងលេងនឹងកូន។ បន្ថែមភាពផ្អែមល្ហែមជាមួយប្តី
ពេលខ្លះគាត់ប្រហែលមិនចាប់អារម្មណ៍ចំពោះស្នាមសង្វារ
ឬក៏គីឡូរបស់អ្នកឡើយ។
៤.
មិនច្បាស់លាស់នឹងអាជីពការងារ
ភាពប្រទាញប្រទង់ចាប់ផ្ដើមកើតឡើង
បើសិនជាសម្រេចចិត្តនៅផ្ទះមើលថែកូន មានអារម្មណ៍ថាឯកោ នឹកការងារ
និងមិត្ត ភក្តិ តែបើសម្រេចចិត្តថាចូលធ្វើការ
មានអារម្មណ៍ថាខុសចំពោះកូន ដែលមិនបានមើលថែផ្ទាល់ដៃ ពេលកូននៅតូច។
ដំណោះស្រាយ៖ សួរយោបល់អ្នកដែលមានបញ្ហាដូចអ្នក។
តែបើអ្នកសម្រេចចិត្តយកមួយណា គួរតែសាកឲ្យបានយ៉ាងហោចមួយឆ្នាំ។
រកការងារក្រៅម៉ោង ដែលអាចឲ្យអ្នកនៅជាមួយកូនបានច្រើន
និងមិនភ្លេចការងារ។
៥.អ្នកគិតថាអ្នកត្រូវតែជាម្តាយល្អគ្រប់ដប់
អ្នកចង់ឲ្យកូន និងគ្រួសារអ្នកទទួលបានភាពឥតខ្ចោះ
គ្មានសម្រែកកូនយំ ផ្ទះតែងតែមានរបៀបរៀបរយ។
បើដូច្នោះមែនអ្នកនឹងឆ្កួតមិនខាន។ ត្រូវលុបគំនិតនេះចោល
ហើយទទួលស្គាល់ថាអ្នកអាចធ្វេសប្រហែស កូនអាចត្រូវរបួសតិចតួច
ព្រោះគេរពឹសពេក។ ផ្ទះអាចរញ៉េរញ៉ៃ ព្រោះអ្នកត្រូវការសម្រាកខ្លះ។
ដំណោះស្រាយ៖ ទុកកូនចោលក្នុងរទេះឈរមួយរយៈ
យកពេលញ៉ាំបាយ ងូតទឹក សម្រាកដកដង្ហើម
មិនមែនជារឿងដែលត្រូវមានទោសនោះទេ។ កុំខ្វល់សំដីដែលអ្នកជុំវិញខ្លួន
តែងតែទូន្មានថា គួរតែធ្វើបែបនេះ បែបនោះ ឫក៍មិនគួរធ្វើបែបនេះបែបនោះ។
យ៉ាងណា គួរតែអរគុណពួកគេ ហើយបន្តធ្វើអ្វីដែលអ្នកគិតថាត្រូវ ៕
