ការគេងរបស់ទារកពី ១ ទៅ ៣ខែ

តើអ្នកកំពុងព្យាយាមបង្កើតផែនការដែលនឹងជួយឱ្យអ្នកធ្វើឱ្យទារករបស់អ្នកគេងលក់ស្រួលមែនទេ? តើអ្នកទើបតែយកទារករបស់អ្នកចេញពីពេទ្យទៅផ្ទះ ហើយពិបាកក្នុងការជួយឱ្យគេងលក់មែនទេ? តើអ្នកបារម្ភថាទារកដែលទើបនឹងកើតរបស់អ្នក គេងមិនគ្រប់គ្រាន់ត្រឹមត្រូវមែនទេ? តើអ្នកបានព្យាយាមអ្វីគ្រប់យ៉ាងប៉ុន្តែ មិនអាចធ្វើឱ្យគេគេងលក់ស្រួលសូម្បីតែពីរបីម៉ោងមែនទេ?

ប្រសិនបើអ្នកជាម្តាយថ្មីដែលកំពុងប្រឈមនឹងបញ្ហានៃការគេងជាមួយទារកទើបនឹងកើត អត្ថបទនេះ គឺសម្រាប់អ្នកហើយ!

បែបបទគេងទូទៅសំរាប់ទារក១ខែ ទៅ៣ខែ

ទារកម្នាក់ៗ មានលក្ខណៈពិសេសរៀងៗខ្លួន ហើយទទួលបាននូវ ប្រព័ន្ធផ្លូវកាយ និងផ្លូវអារម្មណ៍ខុសៗគ្នា។

បែបបទគេងសំរាប់ទារក១ខែ:

ទារកទើបនឹងកើតរបស់អ្នក ស្ទើរតែគេងរហូតរយៈពេលពីរបីសប្តាហ៍ដំបូង។

•សម្រាប់ខែទីមួយ អ្នកអាចរំពឹងថាទារកអ្នកនឹងគេងស្ទើរពេញ១ថ្ងៃ។ ទារករបស់អ្នកអាចគេងបានយូររហូតដល់ ១៨ ម៉ោងក្នុងរយៈពេល ២៤ ម៉ោងក្នុងមួយថ្ងៃ។

•ទារកមិនមែនគេងម្តង រយៈពេល ១៨ ម៉ោងទេ គឺគេងយូរបំផុតត្រឹមបីទៅបួនម៉ោងម្តង។ គេនឹងគេងបែបនេះ បន្តពីថ្ងៃទៅយប់ ហើយពីយប់ទៅព្រឹកវិញ។

•ទារកទើបកើតមិនអាចបែងចែករវាងថ្ងៃនិងយប់បានទេ។

•ខណៈពេលដែលទារកអាយុមួយខែរបស់អ្នកគេង, វដ្តនៃការគេងរបស់គាត់នឹងមានរយៈពេលខ្លីជាងអ្នក ហើយងាយនឹងភ្ញាក់ជាមួយនឹងការរំខាននានា (ការគេងបែបមិនស៊ប់ REM)។ ប៉ុន្តែដំណាក់កាលគេងមិនស៊ប់នេះ មានសារៈសំខាន់សំរាប់ជួយឱ្យខួរក្បាលរបស់កូនអ្នករីកចម្រើន។

បែបបទគេងនៃទារក២ខែ

•នៅចន្លោះអាយុ ៦សប្តាហ៍ ទៅ ៨សប្តាហ៍ អ្នកនឹងសម្គាល់ឃើញថាមានការផ្លាស់ប្តូរបន្តិចម្ដងៗនូវ រយៈពេលដែលគេគេង។

• ទារករបស់អ្នកនឹងចាប់ផ្តើមគេងថ្ងៃតិចជាងគេងយប់។ មានន័យថាកូនរបស់អ្នកអាចគេងបានប្រហែល ១ ឬ ២ ម៉ោងនៅពេលថ្ងៃ។ ហើយម៉ោងដែលគេគេងខ្វះនៅពេលថ្ងៃនោះ គេនឹងគេងសងនៅពេលយប់វិញ គឺរយៈពេលគេងនៅពេលយប់ នឹងវែងជាង។

•ការភ្ញាក់ដឹងខ្លួនរបស់ទារកនៅចន្លោះនៃការគេងនឹងកើនឡើង។ អ្នកអាចសំគាល់បានថា បើគេគេងបាន៣ម៉ោង គេនឹងភ្ញាក់ដឹងខ្លួនយូរជាងពេលដែលគេគេងបានតែ២ម៉ោង។

•ការគេងរបស់ទារកអាយុ២ខែ គឺគេងស៊ប់ជាងមុន។ ការគេងរលីវខ្លីជាងមុន ហើយមិនងាយភ្ញាក់នឹងការរំខានដូចមុនឡើយ។

បែបបទនៃការគេងរបស់ទារក៣ខែ

•នៅពេលកូនរបស់អ្នកមានអាយុ ៣ខែ គេត្រូវការការគេងប្រហែល ១៥ ម៉ោងក្នុងរយៈពេល ២៤ ម៉ោង។ គេនឹងគេងប្រហែល៥ម៉ោងនៅពេលថ្ងៃ ហើយ១០ម៉ោងនៅពេលយប់ ដោយភ្ញាក់២ រឺ៣ដងដើម្បីទទួលការបំបៅ។

•ប៉ុន្តែទារកខ្លះ គេងយូរៗតាំងពីនៅតូច ដូច្នេះ បើកូនរបស់អ្នកគេងយូរមិនភ្ញាក់មកបៅនៅពេលកណ្តាលយប់ មិនមែនជាអ្វីប្លែកនោះទេ ហើយបើគេនៅតែភ្ញាក់ច្រើនដងនៅពេលយប់ ក៏ជារឿងធម្មតាដែរ។

•ដោយសារតែក្រពះរបស់ទារក រំលាយទឹកដោះគោប្រសើរឡើង ធ្វើឱ្យវាមានភាពងាយស្រួលសម្រាប់ទារកក្នុងការបៅច្រើនជាងមុន ហើយគេងបានយូរជាងមុនដែរ។

•ការភ្ញាក់ពេលថ្ងៃអាចយូរដល់ទៅ ១ម៉ោង រឺ១ម៉ោងកន្លះ។ ចំណែកម៉ោងគេងយប់អាចនឹងកាន់តែទៀងទាត់។